7 ოქტომბერს, კორეის რესპუბლიკაში საქართველოს საქმეთა დროებითმა რწმუნებულმა მიხეილ თიგიშვილმა გამართა შეხვედრა კორეის რესპუბლიკის ვაჭრობის, მრეწველობისა და რესურსების სამინისტროს სავაჭრო შეთანხმებებზე მოლაპარაკებების მიმართულების დირექტორთან, მინიონგ ლისთან. შეხვედრაზე განხილულ იქნა საქართველოსა და კორეის რესპუბლიკას შორის ყოვლისმომცველი ეკონომიკური პარტნიორობის შეთანხმების (CEPA) ხელმოწერისთვის მიმდინარე მოსამზადებელი სამუშაოები და ორმხრივი სავაჭრო-ეკონომიკური თანამშრომლობის დღის წესრიგის სხვა მნიშვნელოვანი საკითხები.

7-10 სექტემბერს, კორეის რესპუბლიკაში გაიმართა საქართველოს იუსტიციის მინისტრის, პაატა სალიას, ვიზიტი, რომლის ფარგლებშიც, შედგა მისი შეხვედრა კორეის რესპუბლიკის შინაგან საქმეთა და უსაფრთხოების მინისტრ იუნ ჰო-ჯუნთან. მხარეებმა განიხილეს ციფრული განვითარების სფეროში თანამშრომლობის გაღრმავების შესაძლებლობები, ასევე ხელი მოაწერეს ციფრული მმართველობის სფეროში თანამშრომლობის შესახებ ურთიერთგაგების მემორანდუმს.  ვიზიტის ფარგლებში, საქართველოს იუსტიციის სამინისტროს დელეგაცია ასევე ეწვია კორეის სტიქიური უბედურებების მართვისა და უსაფრთხოების უზრუნველყოფის ეროვნულ ცენტრსა და ციფრული მმართველობის საგამოფენო ცენტრს, სადაც გაეცნო ცენტრების საქმიანობას, სამუშაო პროცესებსა და გამოყენებულ ტექნოლოგიურ გადაწყვეტილებებს. საქართველოს დელეგაციის შემადგენლობაში იყვნენ საქართველოს იუსტიციის მინისტრის პირველი მოადგილე ბექა ძამაშვილი, მინისტრის მოადგილე თამარ ზოდელავა, კორეის რესპუბლიკაში საქართველოს საქმეთა დროებითი რწმუნებული მიხეილ თიგიშვილი და სსიპ „ციფრული მმართველობის სააგენტოს“ თავმჯდომარე სანდრო ცირეკიძე.

8 სექტემბერს საქართველოს იუსტიციის სამინისტროსა და კორეის რესპუბლიკის შინაგან საქმეთა და უსაფრთხოების სამინისტროს შორის ციფრული მმართველობის სფეროში თანამშრომლობის შესახებ ურთიერთგაგების მემორანდუმი გაფორმდა. დოკუმენტი ითვალისწინებს საქართველოში ციფრული მმართველობის თანამშრომლობის ცენტრის შექმნასა და საქართველოს ელექტრონული სერვისების ერთიანი პორტალის, my.gov.ge-ს, შემდგომ განვითარებაზე ერთობლივ მუშაობას. მემორანდუმს ხელი მოეწერა საქართველოს იუსტიციის მინისტრის, პაატა სალიას, კორეის რესპუბლიკაში ვიზიტის ფარგლებში. კორეის რესპუბლიკის შინაგან საქმეთა და უსაფრთხოების მინისტრთან იუნ ჰო-ჯუნთან შეხვედრაზე, მინისტრებმა ასევე განიხილეს ციფრული განვითარების სფეროში თანამშრომლობის გაღრმავების შესაძლებლობები. პაატა სალიამ ხაზი გაუსვა ხელოვნური ინტელექტის, ინოვაციური ტექნოლოგიების, ელექტრონული სერვისებისა და ციფრული მმართველობის მიმართულებით პარტნიორობის მნიშვნელობას. მან ასევე ისაუბრა ბოლო წლებში საქართველოს მიერ ციფრული მმართველობის, ელექტრონული სერვისების, კიბერუსაფრთხოებისა და ინფორმაციული უსაფრთხოების სფეროებში მიღწეულ პროგრესზე. ქართული დელეგაციის შემადგენლობაში ასევე იყვნენ საქართველოს იუსტიციის მინისტრის პირველი მოადგილე ბექა ძამაშვილი, მინისტრის მოადგილე თამარ ზოდელავა, კორეის რესპუბლიკაში საქართველოს საქმეთა დროებითი რწმუნებული მიხეილ თიგიშვილი და სსიპ „ციფრული მმართველობის სააგენტოს“ თავმჯდომარე სანდრო ცირეკიძე.

7 სექტემბერს საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა შეხვედრა გამართა საქართველოში ოფიციალური ვიზიტით მყოფ კორეის რესპუბლიკის ეროვნული ასამბლეის საგარეო ურთიერთობათა კომიტეტის თავმჯდომარე სოგ ჯუნ სონგთან. მხარეებმა განიხილეს საქართველოსა და კორეის რესპუბლიკას შორის არსებული ურთიერთობები და მათი შემდგომი განვითარების შესაძლებლობები. განსაკუთრებული ყურადღება დაეთმო სავაჭრო-ეკონომიკური თანამშრომლობის გაღრმავებას. აღინიშნა, რომ პირდაპირი საჰაერო მიმოსვლა და უვიზო რეჟიმი ხელს შეუწყობს ორ ქვეყანას შორის კავშირების გაძლიერებას. მხარეებმა ასევე ისაუბრეს მაღალი დონის ვიზიტების მნიშვნელობაზე ორმხრივი ურთიერთობების შემდგომი განვითარებისათვის.

7 სექტემბერს, საქართველოს პარლამენტის თავმჯდომარე შალვა პაპუაშვილი კორეის რესპუბლიკის ეროვნული ასამბლეის საგარეო ურთიერთობათა კომიტეტის თავმჯდომარეს, სოგ ჯუნ სონგს და კომიტეტის წევრებს შეხვდა. გაცნობითი ხასიათის შეხვედრაზე, მხარეებმა ორ ქვეყანას შორის არსებულ ურთიერთობებზე ისაუბრეს. დელეგაციის წევრებმა ასევე შეხვედრა გამართეს საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძესთან. მხარეებმა საქართველოსა და კორეის რესპუბლიკას შორის არსებულ ორმხრივ ურთიერთობებსა და საპარლამენტო დონეზე თანამშრომლობის გაღრმავების შესაძლებლობებზე ისაუბრეს. კორეის რესპუბლიკის ეროვნული ასამბლეის საგარეო ურთიერთობათა კომიტეტის დელეგაცია საქართველოში ნიკოლოზ სამხარაძის მოწვევით იმყოფება. 

25 აგვისტოს, საქართველოს საქმეთა დროებითმა რწმუნებულმა, მიხეილ თიგიშვილმა გამართა შეხვედრა კორეის რესპუბლიკის საგარეო საქმეთა სამინისტროს ეკონომიკურ-სამართლებრივ საკითხთა დეპარტამენტის დირექტორთან, ქალბატონ ჯოო ეუნ ჰაესთან. შეხვედრაზე მხარეებმა მიმოიხილეს ორ ქვეყანას შორის სავაჭრო-ეკონომიკური თანამშრომლობის აქტუალური საკითხები. ასევე, განიხილეს საქართველოსა და კორეის რესპუბლიკას შორის „ინვესტიციების წახალისებისა და ურთიერთდაცვის შესახებ“ შეთანხმების (BIT) ირგვლივ მიმდინარე მოლაპარაკებების სტატუსი და შემდგომი ნაბიჯები.

24 აგვისტოს, საქართველოს საელჩოში გაიმართა ურთიერთგაგების მემორანდუმის (MOU) ხელმოწერის ოფიციალური ცერემონია საქართველოს საელჩოსა და იონგსანის კულტურის ფონდს შორის. დოკუმენტს ხელი მოაწერეს საქართველოს საქმეთა დროებითმა რწმუნებულმა, მიხეილ თიგიშვილმა და იონგსანის კულტურის ფონდის თავმჯდომარემ, ლიმ ჰიუნგ-ჯუმ. მემორანდუმი მიზნად ისახავს საქართველოსა და კორეის რესპუბლიკას შორის კულტურის სფეროში თანამშრომლობის გაღრმავებას, მათ შორის ერთობლივი პროექტების განხორციელებას, რომლის ფარგლებშიც 2027 წელს ქ.სეულში გაიმართება პირველი მასშტაბური ქართული კულტურული ღონისძიებები.

24 აგვისტოს, საქართველოს საქმეთა დროებითმა რწმუნებულმა, მიხეილ თიგიშვილმა გამართა სამუშაო შეხვედრა ქ. სეულის იონგსანის რაიონის ახლადდანიშნულ მერთან, კიმ კუიონგ-დესთან. შეხვედრაზე მხარეებმა ორმხრივი თანამშრომლობის გაღრმავების პერსპექტივები განიხილეს. განსაკუთრებული ყურადღება დაეთმო დედაქალაქებსა და ადგილობრივ მუნიციპალიტეტებს შორის პარტნიორობის მნიშვნელობას. მხარეებმა ასევე ისაუბრეს 2027 წლის აპრილში იონგსანის კულტურის ფონდთან თანამშრომლობით დაგეგმილი მასშტაბური ქართულ კულტურულ ღონისძიებების შესახებ.

მიმდინარე წლის 13 აგვისტოს, კორეის რესპუბლიკაში საქართველოს საქმეთა დროებითმა რწმუნებულმა მიხეილ თიგიშვილმა შეხვედრა გამართა კორეის სტარტაპებისა და მეწარმეობის განვითარების ინსტიტუტის (KISED) პრეზიდენტთან, იუ ჯონგ პილთან და ინსტიტუტის ხელმძღვანელობასთან. შეხვედრაზე განხილულ იქნა სამომავლო თანამშრომლობის მიმართულებები. კორეის მხარემ გამოხატა მზაობა საქართველოს ინოვაციებისა და ტექნოლოგიების სააგენტოსთან (GITA) და ქუთაისის ტექნოლოგიურ ჰაბთან თანამშრომლობის თაობაზე. ასევე, საქართველომ მიიღო ოფიციალური მოწვევა მიმდინარე წლის დეკემბერში, სეულში დაგეგმილ საერთაშორისო ფესტივალზე „Come Up Festival” ეროვნული პავილიონით მონაწილეობასთან დაკავშირებით.

საქართველოს საგარეო საქმეთა სამინისტრო აცხადებს საგრანტო კონკურსს „ქართული გემო“. საგრანტო პროგრამის მიზანია ქართული სამზარეულოს პოპულარიზაცია საზღვარგარეთ; დიასპორის წევრების ჩართულობა ქართული კერძების, რეცეპტებისა და კულტურის გაცნობაში; კულინარიული ღონისძიებების, სასწავლო შეხვედრების და ბანაკების ორგანიზება, სადაც მონაწილეები აქტიურად შეისწავლიან ქართული კერძების მომზადებას; დიასპორის მიერ დაფუძნებული ქართული რესტორნების, კულინარიული კლუბებისა და სკოლის პროექტების მხარდაჭერა, საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების ჩართულობით. 

2026 წლის 23 ივნისს, კორეის რესპუბლიკაში საქართველოს საქმეთა დროებითმა რწმუნებულმა, მიხეილ თიგიშვილმა მონაწილეობა მიიღო კორეის რესპუბლიკის პრეზიდენტის, ლი ჯე-მიუნგის მიერ კორეის რესპუბლიკაში აკრედიტებული დიპლომატიური კორპუსისა და საერთაშორისო ორგანიზაციების ხელმძღვანელების პატივსაცემად გამართულ ოფიციალურ ღონისძიებაში. მიხეილ თიგიშვილმა პრეზიდენტს მადლობა გადაუხადა კორეის რესპუბლიკის მიერ საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის და ხაზი გაუსვა ორ ქვეყანას შორის თანამშრომლობის შემდგომი გაღრმავების მნიშვნელობას. ყურადღება გამახვილდა ,,შუა დერეფნის" მნიშვნელობასა და საქართველოს, როგორც რეგიონული დამაკავშირებლისა და სატრანსპორტო ჰაბის როლზე, რაც მნიშვნელოვან შესაძლებლობებს ქმნის კორეასთან თანამშრომლობისთვის ლოგისტიკის, დაკავშირებადობის, ვაჭრობისა და მიწოდებათა ჯაჭვების მდგრადობის მიმართულებებით.

2026 წლის 19 ივნისს, კორეის რესპუბლიკაში საქართველოს საქმეთა დროებითმა რწმუნებულმა მიხეილ თიგიშვილმა გამართა შეხვედრა გამართა კომპანია Hyundai Motor Group-ის გლობალური პოლიტიკის დეპარტამენტის უფროსთან, სანგჯინ კიმთან. მხარეებმა განიხილეს საქართველოსა და Hyundai Motor Group-ს შორის თანამშრომლობის განვითარების პერსპექტივები. განსაკუთრებული ყურადღება დაეთმო საქართველოს პოტენციალს, როგორც რეგიონულ ლოგისტიკურ და საწარმოო ჰაბს. ამასთან, ხაზი გაესვა საქართველოს მიმზიდველ საინვესტიციო გარემოს, მათ შორის თავისუფალი ვაჭრობის შეთანხმებებს, შუა დერეფნის განვითარებულ სატრანსპორტო ინფრასტრუქტურას, ხელსაყრელ საგადასახადო გარემოსა და წყალბადის ენერგეტიკის სფეროში პროექტების განხორციელების შესაძლებლობას.